Bu görüşdə Ayətullah Xamenei Fitr bayramının izzətə səbəb olduğunu qeyd etdi:

"Bu gün İslam dünyasının onu birləşdirən, vahid və səmərəli bir ümmət halına gətirən məqamlara ehtiyacı var. Fitr bayramı da onlardan biridir. Yəni bu bayram İslamın və əziz Peyğəmbərin izzətinin günü-gündən artmasına səbəb olur".

İslam dünyasının birliyə ehtiyacı olduğunu deyən o Həzrət belə vurğuladı:

"Biz müsəlmanlar dünyanın varlı ölkə və toplumlarındanıq. Əgər İslam dünyası bu həssas məqamlardan faydalanmaq istəyirsə, əsaslı bir addıma ehtiyacı var, o, da birlikdir".

İnqilab Rəhbəri İslam dünyasında vəhdətin nə məna kəsb etdiyini belə izah etdi:

"Vəhdət o demək deyil ki, hökumətlər bütün siyasi yanaşmalarda eyni düşünməlidirlər. İslam dünyası birliyinin mənası ortaq mənafeləri tanıyıb bu istiqamətdə hərəkət etməkdir".

Daha sonra Ayətullah Xamenei İslam dünyasının bir ailə olduğunu bildirdi:

"İslam dünyası vahid bir ailə, bir bütövdür. İslam dövlətləri bunu dərk etməli və bu istiqamətdə hərəkət etməlidirlər".

O Həzrət müsəlman dövlətlərə qardaşlıq mesajını verdi və buyurdu:

"İran İslam Respublikası bütün İslam dövlətlərinə əl uzadıb və özünü onlarla qardaş bilir".

İnqilab Rəhbəri müsəlmanların ortaq düşüncəyə gəlməyinin faydasından danışdı:

"Əgər biz müsəlmanlar bir-birimizlə əməkdaşlıq edib ortaq düşüncəyə gələ biləriksə, işğalçı və zalım güclər İslam dünyasına hücum edə, zor tətbiq edə və ya ondan bac tələb edə bilməyəcəklər".

Ayətullah Xamenei məzlumların hüquqlarını müdafiədən danışdı:

"İslam dünyasının Amerika və ona bənzərlərə bac verməsinə məruz qalmasına imkan verməyək, məzlumların hüquqlarını müdafiə edək".

"Bu gün İslam dünyasının bir hissəsi dərin yaralar alıb; Fələstin və Livan yaralıdır", - deyə o Həzrət qeyd etdi.

İnqilab Rəhbəri Fələstində baş verən hadisələrə toxundu və buyurdu:

"Şahidi olduğumuz və ya oxuduğumuz tarixdə iki ildən az bir müddətdə təxminən iyirmi min uşağın hərbi qarşıdurmada qətlə yetirildiyini xatırlamırıq".

Daha sonra o Həzrət Amerikanın İranı hədələməsindən danışdı:

"İslam dünyası Fələstin xalqının ağrı-acısını öz ağrı-acısı kimi hiss edib buna da özünü məsul bilməlidir. Əgər İslam dövlətləri arasında birlik, həmrəylik və həmdərdlik olsa, o zaman digərləri öz mövqelərini yenidən gözdən keçirərlər. Belə olduqda müharibə və hərbi müdaxiləyə də ehtiyac qalmaz".

O Həzrət sözlərinin sonunda Fitr bayramı və İslam ümmətinin birliyindən danışdı və buyurdu:

"Ümid edirik ki, Allah-təala bu Fitr bayramını bütün İslam ümməti üçün mübarək etsin və İslam ölkələrinin rəhbərlərinə bu iradəni, marağı və hərəkəti bəxş etsin ki, İslam ümmətini həqiqi mənada formalaşdıra bilsinlər".